Sjálfbærni í grunninn

Uppruna Bláa Lónsins má rekja til jarðsjávar sem sóttur er úr jarðlögum í um 2.000 metrum undir yfirborði hraunsins sem umlykur starfsemina. Jarðsjórinn er samsettur úr 2/3 sjó og 1/3 ferskvatni og er um 240°C heitur við upptöku. Jarðsjórinn er ríkur af steinefnum og salti og samsetning hans gerir hann einstakan á sinn hátt. Til að mynda er það útfelling á kísli í jarðsjónum sem gefur lóninu sinn heimsþekkta bláa lit. Þessi vökvi myndar einnig  einstakt lífríki þar sem blágrænir örþörungar blómstra við kjöraðstæður.

Áralangar vísindarannsóknir á þessum örþörungi, samspil hans við kísil og á eiginleikum jarðsjávarins hafa sýnt fram á undraverðan lækningamátt hans, bæði hvað varðar meðferð við psoriasis og einnig virkni gegn öldrun húðar.

Jarðsjórinn er fjölnýttur í rekstri fyrirtækisins og að lokum er honum skilað aftur niður í jarðlögin og þannig aftur inn í hringrásarkerfið. Gufan er notuð til að framleiða sjávarsalt úr jarðsjónum og koltvísýringurinn frá nærliggjandi jarðvarmaveri er nýttur til að næra blágræna örþörunga sem einangraðir hafa verið úr einstöku vistkerfi lónsins og ræktaðir í Rannsókna- og þróunarsetri fyrirtækisins.

Bláa Lónið Heilsuvörur ehf. framleiðir hágæðahráefni í húðvörulínur Bláa Lónsins með því að fjölnýta jarðsjó og aðra auðlindastrauma frá jarðvarmaverinu. Þannig stuðlar fyrirtækið að sjálfbærri nýtingu endurnýjanlegra auðlinda og bindingu koltvísýrings með ræktun örþörunga. Öll hráefni félagsins sem nýtt eru í húðvörur þess eru COSMOS APPROVED og geta því verið notuð í COSMOS NATURAL vottaðar vörur.